ጠቅላይ ሚኒስትር ዐቢይ አሕመድ (ዶ/ር) ኅዳር 4/2019 ዓ.ም በማህበራዊ ትስስር ገጻቸው ባሰፈሩት መልእክት፣ ሕዝቡ በመኖሪያ ቤት እጥረት ምክንያት የሚገጥመውን ፈተናና ስጋት በሚገባ እንደሚረዱ አመልክተዋል።
ደረጃቸውን የጠበቁና በተመጣጣኝ ዋጋ የሚቀርቡ መኖሪያ ቤቶችን ማመቻቸት የልማት ግብ ብቻ ሳይሆን ለዜጎች ያለባቸው አደራና ኃላፊነት መሆኑን ጠንቅቀው እንደሚገነዘቡም ጠቅላይ ሚኒስትሩ ገልጸዋል።
ዋነኛ ትኩረታቸው ተጨባጭ ውጤት ማስመዝገብ፣ የሕዝቡን የመኖሪያ ቤት ጫና ማቃለል እና በመላው አገሪቱ ለሚገኙ ቤተሰቦች የተሻለ የኑሮ ምዕራፍ መክፈት መሆኑን አስታውቀዋል።
በተመሳሳይ መልኩ የአዲስ አበባ ከተማ ከንቲባ አዳነች አቤቤ “ቃልን በተግባር!” በሚል መሪ ቃል በማህበራዊ ትስስር ገጻቸው ባስተላለፉት መልእክት፣ በሀገር ደረጃ በአምስት ዓመታት ውስጥ 1.5 ሚሊዮን ቤቶችን ለዜጎች ለማስረከብ ቃል መገባቱን አስታውሰዋል።
ይህንኑ ተከትሎ በአዲስ አበባ ከተማ በ21 ሳይቶች 100 ሺህ ቤቶች እየተገነቡ መሆኑን የገለጹት ከንቲባዋ፣ ከእነዚህም ውስጥ 50 ሺህ ቤቶች በከተማው በጀት እንዲሁም ቀሪዎቹ 50 ሺህ ቤቶች ደግሞ በመንግሥትና በግል አጋርነትና በማኅበራት እየተገነቡ እንደሚገኙ አብራርተዋል።
ከንቲባ አዳነች አክለውም በዕለቱ ከጠቅላይ ሚኒስትር ዐቢይ አሕመድ (ዶ/ር) ጋር በመሆን በቱሉ ዲምቱ 33 ብሎኮችን እና በአዲስ ከተማ ቅጠል ተራ 9 ብሎኮችን መጎብኘታቸውንና ግንባታዎቹ ጥሩ አፈፃፀም ላይ መሆናቸውን መመልከታቸውን ተናግረዋል።

የሕዝቡን የቤት ጫና ማቃለል የልማት ግብ ብቻ ሳይሆን አደራና ኃላፊነት በመሆኑ 24/7 ተግተው እንደሚሠሩም አረጋግጠዋል።


















