በቅርቡ በስራ ላይ እየገጠመን ያለው ነገር ” አይመሬት ያለው ሰው ” እያስባለን ነው። ከምንሰራው ስራ አንዱ መሬት ወይም ነባር ቤት ያላቸው ባለይዞታዎችንና ገንዘብ ያላቸውን በማስማማት ወደ አብሮማልማት እንዲገቡ ፣ የተገነባ ቤት ያላቸው በመሬቱ ግምት የተገነባ ቤት ሰጥተው በአይነት እንዲገበያዩ፣ የተወሰነ ብር ተሰጥቶ ከሚገነባ እንዲወስዱ …አልሚዎችም የሚያዋጣቸውን ብዙ አማራጮችን አቅርቦ በቁጥር እስልቶ አስማምቶ ማፈራረምና ፕሮጀክቱን ማስተግበር ላይ እስከተስማማነው ድረስ አብሮ መስራት ነው።
ይህ በሌሎች ሀገራትም የተለመደ አሰራር ነው። ለምሳሌ በካናዳ ከ ሃያ ዓመታት በላይ እድሜ ያስቆጠረ ከሶስት ሺህ በላይ አልሚዎች አባል የሆኑበት የሪል እስቴት ኢንቨስትመንት ኔትወርክ (Real Estate Investors Network ) የሚባል ማህበር አላቸው።
ማህበሩ በየወቅቱ ያሉ የኢንቨስትመንት አሰራርና የተለያዩ አዋጭ አማራጮችን እያጠና ያለመድሎ ለሁሉም አባል ተቋማት ያቀርባል። አልሚዎቹ የሚያመቻቸውን የኢንቨስትመንት አማራጭ መርጠው በራሳቸው ተጨማሪ ጥናት አድርገው ወደ ትግበራ ይገባሉ።
የዚህ አይነት ተቋም በሀገራችን ቢኖረን ኖሮ በዚህ ወቅት ሊያቀርብ ከሚችለው አገልግሎት ውስጥ አንዱና ዋናው በሀገር ውስጥ ያለውን አቅም በማሰባሰብ በጋራ የማልማት ( Joint venture ) ይመስለኛል። ምክንያቱም የመሬት ውድነት አለ፣ የገንዘብ አቅርቦት እጥረት አለ፣ ፕሮጀክቶች የሚፈልጉት ወጪ ከፍ እያለ በወቅቱ ማጠናቀቅ እየከበደ ነው፣ ከሚጀመረው አዲስ ፕሮጀክት ይልቅ ተጀምሮ የሚቆመው በርክቷል፣ የጀመሩም ማስጨረሻው መላው ጠፍቷቸዋል፣ መሬት ያላቸው ለገበያ ቢያወጡም ጠያቂው ጥቂት ነው፣ መሬት ኖሯቸው ገዢ ወይም አብሮ የሚያለማ ፈላጊዎች እየተበራከቱ ነው።
ግን ምን ያደርጋል ብዙው ባለ መሬቶቹም ሆኑ ኢንቨስትመንት ውስጥ የሚገቡትን ለማስማማት በሚደረግ ጥረት ውስጥ መሬት/ይዞታ ያላቸው ወገኖቻችን አሁንም በቀደመው የመሬት ዋጋ እንዲሰላላቸው ወይም ስሌት የሌለበት ቦሌም ሸጎሌም ላይ በ70/30 ካልሆነ ብለው ግትር እያሉ ንብረታቸውን ዋጋ እያሳጡት መሆኑን ሳይ እየበሰጨኝ ነው።
መሬት በቢሊየን ሲጠየቁ እምብኝ ያሉ በመቶ ሚሊየኖች ሲለመኑ የነበሩ መሬታቸው ህንጻ ሳይሆን ሳር በቅሎበት መናፈሻ ሆኖ እኛም በብስክሊሊት ሽር ብትን እያልንበት እነሱም አራብሳ ላይ በተሰጣቸው ምትክ እየተንጎማለሉ እንዳሉ አብረን እያየን … አሁንም መሬት ያላቸው ሰዎች ዋጋ ለመቀነስ አልፈቀዱም።
መሬት በጣም ውድ እየሆነ መጥቶ ከናበረባቸው ምክንያቶች አንዱ በመንግስት በኩል የነበረው የመሬት አቅርቦት እጅግ ውሱን ወይም ምንም ሆኖ በነበረበት ወቅት ነው። አሁን ግን መንግስት በኮሪደር ልማትና ከተማ ማደስ ፕሮግራም የተነሳ በርካታ ለግንባታ የሚሆን መሬት በጨረታና በድርድር ለአንዳንዶችም በምደባ በሰፊው እያቀረበ ይገኛል።
ብዙዎች ዋጋ ቀንሰው ወቅቱን ታሳቢ ያደረገ ግብይት ከመፈጸም ወይም ወደቋሚ የተመጣጠነ ንብረት ከመቀየር ይልቅ የድሮ የመሬት ውድነት ዞሮ ተመልሶ ይመጣል ብሎ ማሰብ …ጥፋት ነው። ኦገኔ ጊዜው ሌላ መላውም ሌላ ነው።
አይደለም መሬትና ከቤትነት ይልቅ በመሬትነት የሚጠራ ቤት ያለበት ቤት ቀርቶ በጅምር ያለ ያልተጠናቀቀ ግንባታ ከጥቂት ጊዜያት በኋላ ጣጣ ይዞ የሚመጣ ነውና ጥቅምን ቀንሶ ፣ ትርፍን አጋርቶ ፣ አቅምን አሰባስቦ አብሮ ማጠናቀቁ ያድናል….
“አብሮ ማልማት ያድናል” የሚል መፈክር አጽፈን ድምጽ ማጉያም እየጮህን በጎዳና ላይ እንጩህ እንዴ?
በአንዱ የሀገራችን ክፍል የሆነ ነው አሉ። አንድ ዘመድ ያረፈባቸው ወገኖቹ አስክሬኑን ወደ ትውልድ ስፍራው ለመውሰድ ሲጠይቁ ውድ ዋጋ በመጠየቃቸው ቢጨንቃቸው ተስማምተው ያስጭኑታል …የሚፈልጉበት ቦታ ደርሰው ክፈሉ ሲባሉ ያላቸውን ሰጥተው አስክሬኑን እንዲሰጣቸው ቢጠይቁት እምቢ ብሎ የሰጣቸውን ብር ይመልስላቸዋል…. እነሱም አስክሬኑን ትተው መጓዝ ይጀምራሉ …ሹፌሩ ኑ ከፍላችሁ ውሰዱት ሲላቸው…የመለሱለት መልስ “ቀቅለህ ብላው” የሚል ነበር….
አሁንም መሬት ያላቸው ሰዎች ገበያው የሰጣቸውን ተቀብለው ቢሸጡ፣ በቤቶች ቢለውጡ ወይም አቅም ካላቸው ግለሰቦችና ድርጅቶች ጋር በጋራ ቢያለሙ ይመከራሉ ….እምቢ ካሉ…”ቀቅለህ ብላው ” የሚል ባይኖርም “ጎመን ተክለህ ቀንጥሰህ ቀቅለህ ጨው ጨምረህ ብላበት” የሚለው ወይም መልክ የሚይስይዘው ከበራቸው ላይ እይጠፉም።
አሁን ጽፌ ልወጣ ስል አንድ አባገዳ ያሉኝ ትዝ አለኝ “በጊዜ ነው መጠቅለል አለ እባብ ጭንቅላቱ እንዳይቀጠቀጥ”። ልብ ያለው ልብ ይበል። እኛም አይ መሬት ያለው ሰው ማለታችንን እናቁም።
ለማንኛውም ቁልቁል እየወረደ ላለው የሪል እስቴት ኢንቨስትመንት አንዱ ማቃኛው አቅምንና ችሎታን አሰባስቦ በጋራ ማልማት ነው።


















