የፌደራል ቤቶች ኮርፖሬሽን አገራዊ ለውጡን መነሻ አድርጎ ባካሄደው ተቋማዊ ሪፎርም ኮርፖሬሽኑ ትርፋማና ጠንካራ ተቋማዊ አደረጃጀት ያለው ተቋም እንዲሆን አስችሎታል፡፡
ኮርፖሬሽኑ በተቋማዊ ሪፎርም ያገኛቸውን ስኬቶች ለማስቀጠል “የኮርፖሬት አንተርፕረነርሽፕ እና ኢኖቬሽን የአቅም ግንባታ” የስልጠና መድረክ ከኢትዮጵያ አንተርፕረነርሽፕ ልማት ኢንስቲትዩት (EDI) ጋር በመተባበር አስጀምሯል።
ስልጠናው የኮርፖሬሽኑን ከፍተኛ የሥራ ኃላፊዎች እና አመራሮች በአንተርፕረነራዊ እሳቤና በፈጠራ እንዲመሩ ለማስቻል ታስቦ የተዘጋጀ ነው።
በመድረኩ መክፈቻ ላይ እንደተገለጸው፤ በሀገራችን የሚታየውን ሰፊ የቤት አቅርቦት ክፍተትና የዜጎችን ጥልቅ የመኖሪያና የንግድ ቦታዎች ፍላጎት በዘላቂነት ማሟላት የሚቻለው መንግስታዊ አሰራርን በአንተርፕረነራዊ እሳቤና በኢኖቬሽን ማጠናከር ሲቻል እንደሆነ የኮርፖሬሽኑ ዋና ሥራ አስፈጻሚ ክቡር ዶ/ር ረሻድ ከማል ተናግረዋል።
ክቡር ዶ/ር ረሻድ ከማል አክለውም የፌዴራል ቤቶች ኮርፖሬሽን በአንተርፕረነርሽፕ እይታ የተቃኘ እንዲሁም ለኢኖቬሽን ቅድሚያ የሚሰጥ ተቋም ለመሆን ከፍተኛ ጥረት እያደረገ መሆኑን አንስተው፣ ስልጠናው ተጨማሪ አቅም እንደሚሆንም ገልጸዋል።
ለሶስት ቀናት በሚቆየው በዚህ የሥልጠና መድረክ አመራሩ ተጨባጭ ለውጥ እንደሚያመጣ ይጠበቃል።
በቅድሚያ እያንዳንዱ አመራር ዕድሎችን የሚለይ፣ ችግሮችን ቀድሞ የሚገምት እና ፈጣን እርምጃ የሚወስድ የለውጥ መሪ እንዲሆን የውስጥ ሥራ ፈጣሪነትን ከማጎልበት አኳያ ሥልጠናው ትልቅ ፋይዳ ይኖረዋል።
እንዲሁም በሥራ ክፍሎች መካከል ያሉ አጥር ድንበሮችን በማፍረስ እና ከግሉ ዘርፍና ከስታርት-አፖች ጋር በቅንጅት የሚሰራ ክፍት የፈጠራ ባህል ለመገንባት እድሎችን ለመፍጠር ያበረታታል።
በተጨማሪም ረጅም ቢሮክራሲያዊ መንገድ በማሳጠር አዳዲስ የቤት ልማት እና የፋይናንስ ሞዴሎችን በሙከራ ደረጃ ፈትሾ ወደ ፈጣንና ተጨባጭ ውጤት መቀየር በሚቻለበት ረገድም ሥልጠናው ተጨባጭ አቅምን ይገነባል ተብሎ ታምኖበታል።
ይህ ከኢትዮጵያ አንተርፕረነርሽፕ ልማት ኢንስቲትዩት (EDI) ጋር በመተባበር የተዘጋጀው የሥልጠና መድረክ፤ የኮርፖሬሽኑን የለውጥ ጉዞ ከማፋጠን አኳያ ትልቅ ስትራቴጂካዊ ፋይዳ እንዳለው ተገልጿል።
ምንጭ:-የፌደራል ቤቶች ኮርፖሬሽን
















