በኢትዮጵያ ለዓመታት ሲንከባለል የቆየውን የቤት አቅርቦት እጥረት በዘላቂነት ለመፍታት ያለመውና 1.5 ሚሊዮን መኖሪያ ቤቶችን ለመገንባት የተያዘው ግዙፍ ሀገራዊ ፕሮጀክት በይፋ ወደ ተግባር ተሸጋግሯል።
ፕሮጀክቱ የዜጎችን የምቹ መኖሪያ ቤት ፍላጎት ከመመለስ ባለፈ፣ መንግሥት ሀገራዊ አቅሞችን አቀናጅቶ የዜጎችን የኑሮ ደረጃ እንዴት ከፍ ማድረግ እንደሚቻል በተግባር ያረጋገጠበት ታላቅ ክስተት መሆኑ ተገልጿል።
የከተማ እና መሠረተ ልማት ሚኒስትሩ ኢንጂነር መሐመድ አብዱራህማን እንደገለጹት ከዚህ በፊት የተሠሩ ሥራዎችን እንደ መልካም ልምድ በመውሰድ በቀጣይ ዓመታት እስከ 1.5 ሚሊዮን ቤቶችን ለመገንባት የሚያስችል ሰፊ መርሐ ግብር ተቀርጾ በፋይናንስም ሆነ በሌሎች አቅሞች ረገድ በቂ ዝግጅት ተደርጓል።
አሁን ላይ የተጀመሩ ሥራዎችን አጠናክሮ በመቀጠል የዜጎችን የቤት አቅርቦት ጥያቄ በዘላቂነት ለመመለስ የሚያግዝ ተግባራዊ እንቅስቃሴ እየተደረገ መሆኑንም ሚኒስትሩ አስታውቀዋል።
የዚህ ግዙፍ እቅድ ስኬት የመንግሥት ቁርጠኝነት ብቻ ሳይሆን የዓለም አቀፍ የልማት አጋሮችን ዘላቂ ድጋፍ ያካተተ ነው።
በተባበሩት መንግሥታት የሰፈራ ፕሮግራም (UN-Habitat) የከተማ ኢኮኖሚስት የሆኑት ዶክተር በላይነው ፊሌ የከተሞች መስፋፋት እና የሕዝብ ቁጥር መጨመር ለቤት ፍላጎት ማደግ ዋነኛ ምክንያት መሆኑን ጠቅሰዋል።
መንግሥት የጀመረውን ይህን ተነሳሽነት ለመደገፍ ተቋማቸው አራት የተለያዩ የፖሊሲ እና የቴክኒክ ፓኬጆችን ቀርጾ እየተንቀሳቀሰ መሆኑን የገለጹት ኢኮኖሚስቱ በየደረጃው ያሉ የማኅበረሰብ ክፍሎችን ፍላጎት ያገናዘቡ የቤት አማራጮችን ከመንግሥት እና ከግሉ ዘርፍ አጋሮች ጋር በመሆን ማቅረብ ወሳኝ መሆኑን አጽንኦት ሰጥተዋል።
በሌላ በኩል የፕሮጀክቱ ሌላኛው ወሳኝ አጋዥ አካል የግሉ ዘርፍ ንቁ ተሳትፎ ነው። መንግሥት ምቹ አሠራሮችን መዘርጋቱ የግሉ ዘርፍ በኢንቨስትመንት፣ በቴክኖሎጂ እና በኮንስትራክሽን ዘርፍ በስፋት እንዲሳተፍ ሰፊ በር ከፍቷል።
የአያት ሪል እስቴት ተወካይ አቶ አበበ ዘልዑል በበኩላቸው የመንግሥት ከፍተኛ ቁርጠኝነት ሁሉንም የዘርፉን ባለድርሻ አካላት እንደሚያበረታታ ተናግረዋል።
አሠራሩን ወደ መሬት የሚያወርዱ መዋቅሮች እና ሕጎች ተጠናክረው ሲወጡ መንግሥት ከግሉ ዘርፍ እና ከኅብረት ሥራ ማኅበራት ጋር የሚያደርገው ቅንጅታዊ አጋርነት የተሻለ ውጤት እንደሚያስገኝ እና የቤት አቅርቦቱን በስፋት እንደሚያሳድገው ያላቸውን እምነት ገልጸዋል።
በአጠቃላይ የ1.5 ሚሊዮን መኖሪያ ቤቶች ግንባታ ፕሮጀክት ወደ ተግባር መሸጋገሩ የዜጎችን የቤት ባለቤትነት ሕልም ከማሳካቱም ባለፈ የኢትዮጵያን የኮንስትራክሽን ዘርፍና አጠቃላይ የኢኮኖሚ እንቅስቃሴ በአዲስ መልክ እንደሚያነቃቃው ይጠበቃል።
ምንጭ:- ኢቢሲ


















