የአዲስ አበባ ከተማ አስተዳደር በመሃል ከተማ እና በመንገድ ኮሪደር መልሶ ማልማት ፕሮጀክት ያገኛቸውን ግንባር ቦታዎች ለግሉ ዘርፍ ለማስተላለፍ የጨረታ ሰነድ ዝግጅት እንዲጀመር ትዕዛዝ ሰጥቷል።
በዚህም ምክንያት የከተማው መሬት ልማት እና አስተዳደር ቢሮ የመሬት ስሪት ባለሙያዎች የጨረታ ሰነድ ዝግጅት ሥራ ላይ ተጠምደው ሰንብተዋል።
ከዚሁ ጋር ተያይዞ፣ ለሊዝ ጨረታ የሚቀርቡ ቦታዎች በርካታ በመሆናቸው፣ መሬት ለማግኘት ደጅ ሲጠኑ የከራረሙ ባለሃብቶች ሁሉ ገዥ ቦታዎችን የማግኘት ዕድላቸው ሰፊ እንደሚሆን ታምኗል – በቅርቡ በሚወጣው ሊዝ ጨረታ የኮሪደር ልማቱ ሌላኛው ትሩፋት ይፋ ይሆናል።
በስድስት ክፍለ ከተሞች የሚከናወነው የመንገድ ኮሪደር ልማት በዋና ዋናዎቹ የከተማዋ አምስት አውራ ጎዳናዎች ላይ እና እንደ አካባቢው ነባራዊ ሁኔታ ከዋና መንገድ ወደ ውስጥ መቶ ሜትር ገባ ብሎ ጭምር የሚካሄድ በመሆኑ የከተማውን የተለመደ መልክ ይቀይራል ተብሎ ይጠበቃል።

በዚህ መሠረታዊ የመልክ ለውጥ ግዙፍ ንቅናቄ በድምሩ 1,033 ሔክታር መሬት ይለማል። በዚህ ሰፊ እና በከተማው ታሪክ ያልተለመደ ሰፊ ልማት የግሉ ዘርፍም በከፍተኛ ደረጃ ተሳታፊ እንደሚሆን ይጠበቃል።
የአዲስ አበባ ከተማ አስተዳደር ፒያሳን ጨምሮ በመንገድ ኮሪደር መልሶ ማልማት ፕሮጀክት ሊያመጣ ያቀደውን ልማት በዋናነት በራስ አቅም፣ በግልና የመንግስት አጋርነት እና በግሉ ዘርፍ ለማካሄድ ያቀደ ሲሆን፣ ለግሉ ዘርፍ በሊዝ ጨረታ እና በአገራዊ ፋይዳ (ድርድር) ቀመር በሽህ የሚቆጠሩ ቦታዎችን በማቅረብ ዕውን እንደሚያደርግ ዕቅድ ተይዟል።
ከፕሮጀክቱ ቀጣና እየተነሱ ለሚገኙ ነዋሪዎችም መኖሪያ ቤት፣ ምትክ ቦታ፣ ካሳ፣ የመሥሪያ ቦታ፣ የትራንስፖርት ወጪ፣ የሞራል ካሣ ተሰጥቷል፤ በመስጠት ላይም ይገኛል።
በኮሪደር ልማት ቀጣና የሚገኙ ማልማት ለሚችሉ ቅድሚያ የማልማት መብት ተጠብቆላቸው እና ለግል የመኖሪያ ቤት ተነሺዎች ቤታቸውን እስከሚገነቡ ድረስ የቤት ኪራይ ወጪ ጭምር አየተሰጠ መሆኑ ተመልክቷል።

በከተማው እየተካሄደ የሚገኘው ፕሮጀክት ስፋት እና ጥልቀት እንዲሁም ቅንጅት ከዚህ ቀደም በከተማው ታሪክ ታይቶ አያውቅም። የቀድሞው ኢሕአዴግ አመራር የነበሩ ሰው “በዚህ ደረጃ ልማት ማካሄድ እንደሚቻል እንዴት ማሰብ ሳንችል ቀረን!?” በማለት በፀፀት አስታውሰው “አፍራሽ ግብረ ኃይሉም ሆነ የግንባታ ተዋንያኑ በከፍተኛ ትኩረት መሥራታቸው፣ የአመራሮቹ ክትትል ፣ ድጋፍ እና ውሳኔ አሰጣጥ ልዩ ነው” ሲሉ አድናቆታቸውን ተናግረዋል።
በከተማው በአምስት አቅጣጫ የኮንስትራክሽን ማሽኖች ያፈርሳሉ፣ ይቆፍራሉ፣ ይገነባሉ፤ ባለሙያዎች ደፋ ቀና ይላሉ። ፕሮጀክቱም በከፍተኛ ፍጥነት እየተካሄደ ነው። የፕሮጀክቱን ጥድፊያ የዝናብ መጣል፣ የለሊት ቁር እና ድካምም ሊያስቆመው አልቻለም።
ፕሮጀክቱን ጠቅላይ ሚኒስትር ዐብይ አህመድ (ዶ/ር) በቀጥታ የሚከታተሉት ከመሆኑም ባሻገር በቅርበት አመራር እየሰጡበት ይገኛሉ። ከንቲባ አዳነች እና ካቢኔያቸው ሙሉ በሙሉ ትኩረቱን በዚህ የቢሊዮን ብሮች ፕሮጀክት ላይ ያደረገ ከመሆኑም ባሻገር፣ ከተለያዩ አቅጣጫዎች የሚቀርቡ የተደበላለቁ የኀብረተሰብ አስተያየቶችን በመልክ በመልኩ ለመመለስ እየጣረ መሆኑ እየታየ ነው።

ከኀብረተሰቡ ጎልተው ከሚነሱ ጉዳዮች መካከል የፒያሳ ታሪካዊ ዳራ ዕጣ ፈንታ መጨረሻ ተጠቃሽ ነው። አዲስ አበባ ከተማ የ140 ዓመት ታሪክ አላት ከተባለ ዋነኛ ተጠቃሽ ሰፈሮች አራዳ (ፒያሳ)፣ ለገሃር፣ አራት ኪሎ አለፍ ሲልም አዲስ ከተማ (መርካቶ) ናቸው። በነዚህ አካባቢዎች የሚካሄደው ልማት የጋራ ትውስታዎችን ያገናዘበ መሆን እንዳለበት ባለሙያዎች ይናገራሉ።
በተለይ በፒያሳ እና ዙሪያዋ በድጋሚ የሚለማው 66 ሄክታር መሬት ተደጋጋሚ የባለሞያዎች ውይይት ይፈልጋል። ፒያሳ የቁም ነገሮች ጅማሮ እና ጅማሮውን ይዞ የዘለቀ እንደመሆኑ በአዲሱ ፕሮጀክት የወርቅ እና ጌጣጌጦች ክላስተር፣ የሉካንዳ ቤቶች ክላስተር፣ የጣፋጭ ምግቦች ክላስተር እንዲሁም ቴዎድሮስ አደባባይ የሚገኘው ሴጣን ቤት እና ዙሪያ ገባው የመዝናኛ ኢንዱስትሪ (ፊልም፣ ቴያትር እና ሙዚቃ) ክላስተር አካቶ መገንባት እንዳለበት ባለሙያዎች ይናገራሉ።
መንግስት እነዚህን ቁም ነገሮች ሳይረፍድ ከግንዛቤ እንዲያስገባ የሚጠይቁም በርካቶች ናቸው።
ምንጭ፦ ውድነህ ዘነበ

















