የአዲስ አበባ ከተማ አስተዳደር ቤቶች ልማት ኮርፖሬሽን ባመቻቸው ዕድል መሠረት 70 በመቶ ክፍያ ፈጽመው ቤቶች ለመገንባት መሬት የወሰዱ ማኅበራት፣ ቦታቸው ያላግባብ ለግለሰቦች የተላለፈበት ምክንያት እንዲነገራቸው ቅሬታ አቀረቡ፡፡
የቤቶች ልማት ኮርፖሬሽን ባወጣው ዕጣ መሠረት ቦታ ከወሰዱት 57 ማኅበራት ውስጥ፣ አብዛኞቹ እስካሁን ድረስ ምንም ዓይነት ግንባታ አለመጀመራቸውን የሪፖርተር ምንጮች ተናግረዋል፡፡
ኮርፖሬሽኑ ማኅበሩ 70 በመቶ ክፍያ ፈጽመው ቤት እንዲያለሙበት የሰጠው የመሬት ይዞታ አርሶ አደሮች የሠፈሩበት፣ በግለሰቦችም ይገባኛል የሚል ጥያቄ የሚነሳበት እንደሆነ ስማቸው እንዳይጠቀስ የፈለጉ የማኅበራት አባላት አስረድተዋል፡፡
የማኅበር አባላቱ ኮርፖሬሽኑ ባወጣው ዕጣ መሠረት በተለያዩ አካባቢዎች ቦታቸውን መውሰዳቸውን፣ ነገር ግን እስካሁን ድረስ ቤት የሚገነቡ ማኅበራት እንደሌሉ አክለው ገልጸዋል፡፡
የቤቶች ልማት ኮርፖሬሽን ማኅበራት ቦታ ወስደው እንዲያለሙ ካዘጋጀው መሬት ውስጥ አንዱ ወይራ ሠፈር አካባቢ እንደሆነ የገለጹት አባላቱ እዚህ አካባቢም ዕጣ ደርሷቸው ቦታ የወሰዱት ሁለት ማኅበራት በአንዲት ግለሰብ የይገባኛል ጥያቄ በመነሳቱ ቦታቸው በፍርድ ቤት መታገዱን ጠቁመዋል፡፡
ሁለቱ ማኅበራት መሬቱን ለማስመለስ በተደጋገሚ የአካባቢውን ወረዳ ቢያናግሩም፣ ምላሽ አለማግኘታቸውንና በፍርድ ቤት ከታገደ ስድስት ወራት ገደማ ማስቆጠሩን ተናግረዋል፡፡
ጉዳዩን በተመለከተ የቤቶች ልማት ኮርፖሬሽን እንዲያይላቸው አባላቱ በተደጋጋሚ የኮርፖሬሽኑን በር ማንኳኳታቸውን፣ በቅርቡም ጥያቄያችሁ ምላሽ ይሰጥበታል እንደተባሉ አስረድተዋል፡፡
በአሁኑ ወቅት 57 ማኅበራት ኮርፖሬሽኑ ባስቀመጠው መመርያ መሠረት አራት ቢሊዮን ብር ተቀማጭ ማድረጋቸውን አባላቱ ገልጸው፣ ጉዳዩን ኮርፖሬሽኑ በፍጥነት እንዲፈታው ጥያቄ ማቅረባቸውን ተናግረዋል፡፡
የቤቶች ልማት ኮርፖሬሽን ምክትል ቢሮ ኃላፊ መኮንን ምጀና (ኢንጂነር) እንደገለጹት፣ 70 በመቶ ክፍያ ፈጽመው ቤት ለማልማት ለተዘጋጁ የማኅበራት አባላት 27 ሔክታር መሬት ተዘጋጅቶ ተላልፏል፡፡
እስካሁን ድረስ አቅምና ፍላጎት አለን ብለው የተመዘገቡ ማኅበራት 54 መሆናቸውን፣ ማኅበራቱ 30 በመቶ የሚሆነውን ገንዘብ ከባንክ እንዲያገኙ ኮርፖሬሽኑ የመግባቢያ ሰነድ እንደፈረመላቸው አስረድተዋል፡፡
በዚህ መሠረት የማኅበራት አባላት በአሁኑ ወቅት የቅድመ ግንባታ ዝግጅት እያደረጉ መሆናቸውን፣ መሬታችን በግለሰቦች ተወስዷል የሚል ቅሬታ ለኮርፖሬሽኑ አለመቅረቡን ጠቁመዋል፡፡
በአጠቃላይ በ54 ማኅበራት የተደራጁ ከአራት ሺሕ በላይ አባላት እንዳሉ የገለጹት ኃላፊው፣ በአሁኑ ወቅት የሁሉም ማኅበር የቦታ ይዞታ በራሳቸው እጅ ሥራ እንደሚገኝ ተናግረዋል፡፡
እስካሁን ምን ያህል ቤቶች ተገንብተዋል ተብሎ ለቀረበላቸው ጥያቄ፣ ማኅበርተኞቹ ራሳቸው ዲዛይን አድርገው እየሠሩ ነው ብለዋል፡፡ የግንባታ ፈቃድና ሌሎች ጉዳዮች እንዲፀድቅላቸው ኮርፖሬሽኑ ለአዲስ አበባ ከተማ አስተዳደር ግንባታና ቁጥር ባለሥልጣን ጉዳያቸው እንዲታይ አድርጓል ሲሉም አክለዋል::
ምንጭ፦ ሪፖርተር


















