ለ21 ዓመታት ኮንዶሚኒየም ይደርሰናል ብለው ሲቆጥቡ የቆዩ የኮንዶሚኒየም ነባር ተመዝጋቢዎች ዕጣ ሳይወጣላቸው፣ ቤቶቹ ለልማት ተነሽዎች በመሰጠታቸው ቅሬታ አቀረቡ፡፡
ከ1997 ዓ.ም. ጀምሮ የኮንዶሚኒየም ቤቶችን በዕጣ ለማግኘት ሲጠባበቁ የቆዩ በርካታ ተመዝጋቢዎች እያሉ፣ ለልማት ተነሽዎች ቤቶች መሰጠታቸው ኢፍትሐዊ እንደሆነ ቅሬታ አቅራቢዎቹ ገልጸዋል፡፡
ለልማት ተነሽዎች ለምን ቤት ተሰጣቸው እንደማይሉ የተናገሩት ቅሬታ አቅራቢዎቹ፣ ለረዥም ዓመታት ፍትሐዊነት በጎደለው መንገድ ለእነሱ ሳይሰጣቸው መቅረቱ እንዳሳዘናቸው አሳድረዋል፡፡ ለልማት ተብሎ ቤታቸው የፈረሰባው ዜጎች ቤት ሲሰጣቸው የ1997 እና የ2005 ዓ.ም. የኮንዶሚኒየም ቤቶች ተመዝጋቢዎች ጉዳይ በዝምታ መታለፉ ቅሬታ እንደፈጠረባቸው ገልጸዋል፡፡
የኮንዶሚኒየም ቤቶች ግንባታ እስኪያልቅ ድረስ ለምን በመንግሥት የተሠሩ ቤቶች አይሰጡንም ያሉት ተመዝጋቢዎቹ፣ ለሁለት አሥርት ዓመታት ቤት ለማግኘት በመጠበቃቸው በተለየ ሁኔታ በከተማ አስተዳደሩ ሊስተናገዱ እንደሚገባ ተናግረዋል፡፡
በአሁኑ ጊዜ የቤት ኪራይና የልጆች ትምህርት ቤት ክፍያዎች ጣራ በመንካታቸው፣ ለችግር ተዳርገናል ያሉት ተመዝጋቢዎች፣ የኢትዮጵያ ዜጋ አይደለንም ወይ ሲሉም ቅሬታቸውን አሰምተዋል፡፡
ለዓመታት ምላሽ በተነፈገው ጥያቄያቸው ምክንያት በመንግሥት ላይ ያላቸው እምነት መሟጠጡን ገልጸዋል፡፡
ተመዝጋቢዎቹ ለሕዝብ ዕንባ ጠባቂ ተቋም፣ ሰብዓዊ መብቶች ኮሚሽን፣ ለጠቅላይ ሚኒስትር ጽሕፈት ቤትና ሌሎች ተቋማት ቅሬታቸውን ቢያሰሙም እስካሁን መፍትሔ እንዳላገኙ አክለዋል፡፡
የአዲስ አበባ ከተማ የቤቶች ልማት ኮርፖሬሽን ዋና ዳይሬክተር አቶ ሽመልስ ታምራት እንደተናገሩት፣ አጠቃላይ የቤቶች ግንባታ ከሁለትና ከሦስት ዓመት ተኩል በኋላ የብድር አቅርቦት ችግር ተጨማሪ ግንባታ ማድረግ አላስቻለም፡፡
ችግሩ እስኪፈታ ድረስ ግንባታ እንደማይካሄድ፣ ኮርፖሬሽኑ ያለበትን ውዝፍ ዕዳ እስኪከፈል ድረስም ሲያገኝ የነበረው ብድር መከልከሉን ዋና ዳይሬክተሩ ተናግረዋል፡፡
ኮርፖሬሽኑ ካለበት ዕዳ ውስጥ 36 ቢሊዮን ብር ተመላሽ ማድረጉን ገልጸው፣ ቀሪ 37.7 ቢሊዮን ብር ያልተከፈለ ውዝፍ ዕዳ እንዳለበትና ለመክፈልም የተለያዩ አማራጮችን እያጤነ መሆኑን አስረድተዋል፡፡
በአሁኑ ወቅት የኢትዮጵያ ንግድ ባንክ ብድር የሚሰጠው ለማጠናቀቂያ ሥራ ብቻ እንደሆነ፣ ለሰፊ የቤት ግንባታ ግን ተጨማሪ ብድር እንደማይሰጥ ጠቁመዋል፡፡
ዕጣ ያልወጣላቸው የኮንዶሚኒየም ተመዝጋቢዎች እያሉ ለምን ለሌሎች ይሰጣል ተብሎ ለቀረበላቸው ጥያቄ በሰጡት ምላሽ፣ ለልማት ተነሽዎች ቅድሚያ መስጠትን መመርያው የሚያዝና የሚደግፈው መሆኑን ገልጸው፣ ነገር ግን የኮንዶሚኒየም ዕጣ ጠባቂዎችን ወደ ጎን ከመግፋት ጋር መገናኘት የለበትም ብለዋል፡፡
የቤት አቅርቦት ጉዳይ የ1997 እና የ2005 ዓ.ም. የቤት ተመዝጋቢዎች ችግር ብቻ ሳይሆን፣ በአጠቃላይ በቤት አቅርቦቱ በአማራጭ የቤት ልማት ላይ እየተሠሩ እንደሆነ አስረድተዋል፡፡
ከተለመዱት 40/60 እና 20/80 ቤቶች በተጨማሪ በ70/30 ፕሮግራምና በማኅበር ቤቶች አቅም ያላቸው እንዲገነቡ የሚያስችል አሠራር መዘርጋቱን ተናግረዋል፡፡
ኮርፖሬሽኑ እስካሁን የጋራ መኖሪያ ቤቶችን ሲገነባ የነበረው በቦንድ ግዥ እንደነበረ፣ አሁን ግን የከተማ አስተዳደሩ ካለው በጀት ላይ እየመደበ ብድሩን እየከፈለና ለኪራይ የሚሆኑ ቤቶች እየገነባ ነው ብለዋል፡፡
ከዚህ በተጨማሪ መንግሥትና ባለሀብቶች ተቀናጅተው የሚገነቧቸው ቤቶች መኖራቸውንና ለዝቅተኛ የኅብረተሰብ ክፍሎች እየተሰጡ መሆናቸውን ገልጸዋል፡፡
የኮንዶሚኒየም ተመዝጋቢዎችን በተመለከተ ቁጠባ ያቋረጡ እንዳሉ ገልጸው፣ “ነገር ግን አሁንም ኮንዶሚኒየም ተመዝጋቢዎች የሉም ወይም ጨርሰን ሰጥተናል አላልንም” ብለዋል፡፡
የኮንዶሚኒየም ተመዝጋቢዎች ቅሬታ ትክክል መሆኑን የገለጹት አቶ ሽመልስ፣ ነገር ግን ከተማው ያለበትን የቤት አቅርቦት ችግር ሲፈታ የተመዝጋቢዎቹን ችግርም በዚያው እንደሚፈታ ገልጸዋል፡፡
“የነባሩ የዕጣ አወጣጥ ሒደት ቆሟል ወይም አልቆመም ብለን መናገር አንችልም” ያሉት ዋና ዳይሬክተሩ፣ ምናልባት የባንክ ብድር ከተመለሰ እንደገና በሌላ ብድር ቤቶች ተገንብተው ለዕጣ ጠባቂዎች ለመስጠት ጥረት እንደሚደረግ ጠቁመዋል፡፡ የተመዝጋቢዎች ዕጣ የማውጣት ሒደት ይቀጥላል ወይም አይቀጥልም የሚለው በቤት አቅርቦት ሁኔታው እንደሚወሰን ገልጸዋል፡፡
እንደ አቶ ሽመልስ ገለጻ፣ ከኮሪደር ልማት ተነሺዎች በአንድም በሌላም መንገድ ቢጣራ ተመዝጋቢዎች አሉ፡፡ ለኮሪደር ልማት ተነሽዎች የ40/60 እና የ20/80 ቤቶች ተሰጥተው አልቀው ወደ ኪራይ ቤት እየተገባ መሆኑን ገልጸዋል፡፡
የኢትዮጵያ ሕዝብ ዕንባ ጠባቂ ተቋም የሕግና የአስተዳደር በደል ምርመራ መሪ ሥራ አስፈጻሚ አቶ መንግሥቱ ቀና በበኩላቸው፣ በ1997 ዓ.ም. ኮንዶሚኒየም ለማግኘት ተመዝግበው ዕጣ ያልወጣላቸውን በተመለከተ ኮርፖሬሽኑን በደብዳቤ መጠየቁን ገልጸዋል፡፡
ይሁን እንጂ በተደጋጋሚ ጥያቄ ቢቀርብም ምላሽ አለመገኘቱን አቶ መንግሥቱ ገልጸው፣ እንደገና በደብዳቤ ተጠይቆም ምላሽ ካልተገኘ ወደ የሕዝብ ተወካዮች ምክር ቤት ለማምራት መታቀዱን ተናግረዋል፡፡
“ኮርፖሬሽኑ ለኮንዶሚኒየም ተመዝጋቢዎች ዕጣ ያላወጣበት ምክንያት ይህ ነው ብለው ስላልነገረን ተጨማሪ ምርመራ ለማድረግ አልቻልንም” ብለዋል፡፡ ጉዳዩ ገና በሒደት ላይ እንደሚገኝና ለከተማ አስተዳደሩ ደብዳቤዎች እየተጻፉ መሆናቸውንና በሚፈለገው ልክ ምላሽ ካልተገኘ ግን ወደ ፓርላማ እንደሚያመሩ አስረድተዋል፡፡
የተመዝጋቢዎቹ ችግር ከዓመት ዓመት እየተላለፈ ያለ ችግር መሆኑን፣ ዜጎች ምላሽ እንዲያገኙ የሕዝብ ተወካዮች ምክር ቤት ሥራ መጀመርን ተቋማቸው እየተጠባበቀ እንደሚገኝ አቶ መንግሥቱ ገልጸዋል፡፡
ምንጭ፦ ሪፖርተር


















