በከተማ አስተዳደሩ ውስጥ በተለይ በመሬትና ግንባታ ዘርፍ የሚስተዋሉ የመልካም አስተዳደር ችግሮችንና የተገልጋይን እንግልት ለመቅረፍ ያለመው “የመሬት ፕላንና የግንባታ ክላስተር” አደረጃጀት አስራ ዘጠኝ ተቋማትን አካቶ በይፋ ስራ ጀምሯል።
የመሬት ልማትና አስተዳደር ቢሮ ኃላፊ አቶ መኮነን ያዒ፣ የክላስተሩን ምስረታ እና የተቋማት ቅንጅታዊ ትስስር ማንዋል ስልጠና በተሰጠበት መድረክ ላይ እንደተናገሩት ክላስተሩ በየተቋማቱ አገልግሎት ፈልጎ የሚመላለሰውን ተገልጋይ፣ ቅንጅትን በመፍጠርና በዘመናዊ ቴክኖሎጅ በመታገዝ የአንድ መስኮት አገልግሎት እንዲያገኝ ለማድረግ ያግዛል።
ይህ አሰራር የጋራ ግቦችን ከመፈፀም በተጨማሪ በከተማ ደረጃ የተቀመጡ የትራንስፎርሜሽን ዕቅዶችን ለማሳካት እንዲሁም የሀብት አጠቃቀምን በአግባቡና በቁጠባ ለመጠቀም ያስችላል ሲሉም አክለዋል።
በመድረኩ የተቋማት ቅንጅታዊ አሰራር ማስፈፀሚያ ማንዋልም የቀረበ ሲሆን
በከንቲባ ጽ/ቤት የሚመራው ይህ አደረጃጀት ከተማ አስተዳደሩ ካዋቀራቸው ሰባት ክላስተሮች አንዱ ስለመሆኑም ተመላክቷል።
በውይይቱም ክላስተሩ ተቋማት በቅንጅት ባለመሰራታቸው ምክንያት ሲደርስ የነበረውን የተገልጋይ እንግልት ከመቅረፉም ባሻገር፣ በመረጃ መፋለሶችና አለመግባባቶች የሚፈጠሩ ችግሮችን ለማስተካከል ያግዛልም ተብሏል።
የመሬት ፕላንና የግንባታ ክላስተር በምስረታ መድረኩ የመጀመሪያ ሩብ ዓመት ስራዎችን በመገምገም በቀጣይ በአደረጃጀቱ ማንዋል መሰረት በጋራ ለመስራት ከስምምነት ተደርሷል።
ምንጭ: የአዲስ አበባ ከተማ አስተዳደር የመሬት ልማትና አስተዳደር ቢሮ


















