በአዲስ አበባ ከተማ አስተዳደር የመንግሥት ሠራተኞች የማኅበር ቤት ግንባታ መነሻ ዋጋ በካሬ ሜትር ከዚህ ቀደም ከነበረበት 35 ሺህ ብር ወደ 50 ሺህ ብር ከፍ መደረጉ በመምህራን እና በማኅበራት አባላት ዘንድ ከፍተኛ ቅሬታና ስጋት መፍጠሩ ተገለጸ።
የከተማ አስተዳደሩ ቤቶች ልማትና አስተዳደር ቢሮ ለኅብረት ሥራ ኮሚሽን በጻፈው ደብዳቤ መሠረት፣ በታህሳስ ወር 2017 ዓ.ም በካሬ 35 ሺህ ብር ተስሎ የነበረው መነሻ ዋጋ በመስከረም ወር 2018 ዓ.ም በተደረገ ክለሳ ወደ 50 ሺህ ብር እንዲያድግ ተወስኗል። በተጨማሪም በአዲስ አበባ ሳይንስና ቴክኖሎጂ ዩኒቨርሲቲ በቀረበው ወቅታዊ የዲዛይንና የዋጋ ጥናት መሠረት፣ አጠቃላይ የግንባታ ዋጋው እንደ ቦታው እና እንደ ግብዓቱ ሁኔታ በካሬ እስከ 82 ሺህ ብር ሊደርስ እንደሚችል ተጠቅሷል።
የማኅበራቱ ስጋት እና የተፈጠረው ውዝግብ
በ57 ማኅበራት ተደራጅተው መሬት ከተረከቡት ከ6 ሺህ በላይ መምህራን መካከል በርካቶቹ አዲሱ የዋጋ ተመን ከአቅማቸው በላይ መሆኑን ገልጸዋል። አባላቱ የመጀመሪያውን የ25 በመቶ ቅድመ ክፍያ የከፈሉት ከወርሃዊ ደመወዛቸው በተጨማሪ በብድር እና በቤተሰብ ድጋፍ መሆኑን በመጥቀስ፣ አሁን የቀረበው የዋጋ ጭማሪ ያልጠበቁት እንደሆነባቸው አስረድተዋል።
በተጨማሪም ክፍያውን መቀጠል ባለመቻላቸው “ገንዘባችን ይመለስልን” ብለው የጠየቁ አባላት “ገንዘቡ አይመለስላችሁም” የሚል ምላሽ እንደተሰጣቸው የተናገሩ ሲሆን፣ በዚህም ሳቢያ በጥቂት ማኅበራት ዘንድ ግንባታ የመግታትና የመተው ሁኔታዎች መከሰታቸው ተሰምቷል።
የከተማ አስተዳደሩ ምላሽ
በጉዳዩ ላይ አስተያየታቸውን የሰጡ የከተማ አስተዳደሩ ኃላፊ በበኩላቸው፣ አስቀድሞ የቀረበው የ35 ሺህ ብር ሂሳብ መነሻ እንጂ የመጨረሻው የግንባታ ዋጋ ውሳኔ እንዳልነበረ ገልጸዋል። አስተዳደሩ መሬት በነፃ የማቅረብ፣ የዲዛይን ድጋፍ የማድረግ እና የ75 በመቶ የባንክ ብድር የማመቻቸት ኃላፊነት እንዳለበት ጠቁመው፣ የመጨረሻው ወጪ የሚወሰነው ማኅበራቱ በሚመርጡት የዲዛይን ዓይነት፣ በግብዓቶች ደረጃና በወቅታዊ የገበያ ሁኔታ እንደሆነ አስረድተዋል።
ሆኖም አስተዳደሩ የመምህራንን አቅም ያገናዘበ አሰራር እንዲኖር እና ከተቋራጮች በኩል የተጋነነ ዋጋ እንዳይጠየቅ ከዩኒቨርሲቲው የዋጋ ጥናትና ከወቅታዊ የግንባታ ግብዓቶች ተመን ጋር የማቀራረብ ጥረት እንደሚያደርግ አስታውቋል።
ምንጭ፦ ዋዜማ
















