የኢትዮጵያ መከላከያ ፋውንዴሽን ከታወቀው ዓለም አቀፍ የሪል እስቴት አልሚ ሪፖርታጅ ፕሮፐርቲስ (Reportage Properties) ጋር በመተባበር በአዲስ አበባ ከተማ ዘመናዊ የመኖሪያ ቤቶችን ለመገንባት የሚያስችለውን የመሰረት ድንጋይ የማስቀመጥ ስነ-ስርዓት ተካሄደ።
የአጋርነቱ ዋና ዋና ነጥቦች እና አላማዎች የቤት ፍላጎትን ማሟላት እንደሆነ በመርሀገብሩ የተገለፀ ሲሆን በአዲስ አበባ ከተማ ከ6 እስከ 7 ሚሊዮን የሚደርስ ህዝብ እንደሚኖር እንዲሁም ከፍተኛ የመኖሪያ ቤት ክፍተት ይታያል።
ይህንን ክፍተት ለመሙላት ከመንግስት ጥረት ጎን ለጎን እንዲህ አይነት የህዝብ እና የግል ዘርፍ አጋርነት (Public-Private Partnership) ትልቅ ሚና ይጫወታል ተብሏል።
ፕሮጀክቱ ዘመናዊ ቴክኖሎጂ እና ጥራት ባለው መልኩ በአዲስ አበባ አፍሪካ ህብረት አካባቢ በሚገኝ ቦታ ላይ የሚገነባ ሲሆን፣ በከፍተኛ ጥራት፣ ዲዛይን እና ፍጥነት ተገንብቶ ለአገልግሎት እንደሚበቃ ተገልጿል።

የመከላከያ ሰራዊቱን ተጠቃሚ ከማድረግ አኳያም ከዚህ የኢንቨስትመንት ፕሮጀክት የሚገኘው ገቢ የሀገር የመከላከያ ሰራዊት አባላትንና ቤተሰቦቻቸውን የመኖሪያ ቤት ጥያቄ ለመመለስ እና ህይወታቸውን ለማሻሻል ይውላል ተብሏል።
ይህ ጥረት በኢትዮጵያ እና በተባበሩት አረብ ኤሚሬቶች (UAE) መካከል ያለውን የሁለትዮሽ እና የልማት ትብብር ይበልጥ የሚያጠናክር መሆኑ ተመልክቷል።
ይህ ፕሮጀክት በወቅቱ፣ በጥራት እና በፈጣን ሁኔታ ተጠናቆ ለማህበረሰቡ እና ለሰራዊቱ አባላት አገልግሎት እንዲሰጥ የመከላከያ ሚኒስቴር እና የፋውንዴሽኑ ከፍተኛ አመራሮች አስፈላጊውን ክትትል እና ድጋፍ እንደሚያደርጉ ተገልጿል።
በስነ-ስርዓቱ ላይ የኢፌዴሪ መከላከያ ሚኒስትር ዴኤታ ወይዘሮ ሎሚ በዶ ፣ የኢትዮጵያ መከላከያ ፋውንዴሽን ሀላፊ ብርጋዴር ጄኔራል ደረጀ መገርሳ፣ የመከላከያ የውጭ ጉዳይ ሀላፊ ሌተናል ጄኔራል ተሾመ ገመቹ፣ በኢትዮጵያ የተባበሩት አረብ ኤሚሬቶች (UAE) አምባሳደር አብዱላህ ሀሰን፣ የሪፖርታጅ ፕሮፐርቲስ ከፍተኛ ሀላፊዎች፣ ኮንትራክተሮች እና ጥሪ የተደረገላቸው እንግዶች ተገኝተዋል።
ምንጭ:- ድሬቲዩብ


















