በኢትዮጵያ የሪል እስቴት ዘርፍ ላለፉት አሥር ዓመታት በልዩ የገበያ አሠራሩ የሚታወቀው ቴምር ፕሮፐርቲስ (ቴምር ሪል እስቴት)፣ የምስረታ አሥረኛ ዓመቱን በማስመልከት በመገናኛ ጫካ አካባቢ ከመሬት በታች 8 ወለል እና ከመሬት በላይ 18 ወለል ለሚሆን ግዙፍ ዘመናዊ ሕንፃ ግንባታ ከሁለት ዓለም አቀፍ የቻይና ኩባንያዎች ጋር የመግባቢያ ስምምነት ተፈራረመ።
የፕሮጀክቱን ዓለም አቀፍ ጥራትና የግንባታ ፍጥነት ለማረጋገጥ ከሁኢ ቼን (Hui Chen) እና ሳንሼንግ (San Sheng) ከተባሉ የቻይና ኮንስትራክሽን ኩባንያዎች ጋር ስምምነት ያደረገው ቴምር ፕሮፐርቲስ፣ አጋርነቱ በሀገር ውስጥ የሚታየውን የግንባታ ቁሳቁሶች አቅርቦትና የጥራት ክፍተት ለመሻገር የሚያስችል እንደሆነ ገልጿል።
በኢትዮጵያ የሚገኙ የሪል እስቴት አልሚዎች ጥራት ያላቸውን ሥራዎች በወቅቱ ለማስረከብ በሀገር ውስጥ የሚገኙ የግንባታ እቃዎች አቅርቦት ማነስና የጥራት መጓደል ከፍተኛ ፈተና እንደሆነባቸው በተደጋጋሚ ይናገራሉ። ይህ ክፍተት የፕሮጀክቶችን የማጠናቀቂያ ጊዜ ከማራዘሙም በላይ የውጭ አጋሮችን ማካተት አስፈላጊ ማድረጉን የዘርፉ ባለሙያዎች ይገልጻሉ።
የቴምር ፕሮፐርቲስ የኢቨንትና ፕሮሞሽን ሃላፊ አቶ ሁስማን መሃመድ ከካፒታል ጋዜጣ ጋር ባደረጉት ቆይታ፣ በአሁኑ ወቅት በሪል እስቴት ዘርፉ ላይ የሚታዩትን አቅርቦትና ተዛማጅ ሁለገብ ችግሮች በዝርዝር አብራርተዋል።
ለአካባቢ ጥበቃ ባለሙያዎች የተሰጠ አርአያነት ያለው ዕውቅና
ቴምር ፕሮፐርቲስ በሪል እስቴት ዘርፍ ያስመዘገበውን የ10 ዓመታት ስኬት ከማኅበራዊ ኃላፊነት ጋር በማጣመር፣ ለአካባቢ ጥበቃ እና ለሥነ-ምህዳር ሚዛን መጠበቅ ከፍተኛ አስተዋጽኦ ላበረከቱ አካላት ልዩ የዕውቅና እና የስጦታ ፕሮግራም አዘጋጅቷል።
በዚሁ መሠረት፦
- በጉለሌ ዕፅዋት ማዕከል የተፈጥሮ ሀብትንና ደንን ቀን ከሌት ሲጠብቁ ለቆዩ 75 የደን ጠባቂ ሬንጀሮች፣
- የ”ፕሎጊንግ ኢትዮጵያ” (Plogging Ethiopia) መስራች ለሆኑት ፕሮፌሰር ፍሬው ከፍያለው የዕውቅና እና የገንዘብ ሽልማት አበርክቷል።
ይህ ሁሉን አቀፍ እንቅስቃሴ ቴምር ፕሮፐርቲስ የደንበኞችን የቤት ባለቤትነት ፍላጎት ከማሟላት ባለፈ፣ ዘላቂ የከተማ ልማትንና የተፈጥሮ ጥበቃን በአንድ የልማት ራዕይ ውስጥ አስተሳስሮ ለመጓዝ ያለውን ቁርጠኝነት የሚያረጋግጥ መሆኑ ተጠቅሷል።
















