የቀበሌ ቤት ውል አቋርጣለሁ በሚል 50 ሺህ ብር ጉቦ ሊቀበል የነበረው የቤቶች አስተዳደር ጽ/ቤት ሃላፊ በቁጥጥር ስር ዋለ።
የጉለሌ ክፍለ ከተማ ወረዳ 05 የቤቶች አስተዳደር ፅ/ቤት ሃላፊ የቀበሌ ቤት ውል አቋርጣለሁ በማለት ከድሀ ጉሮሮ ጉቦ ሊቀበል ሲል እጅ ከፈንጅ ያዝኩኝ ሲል የጉለሌ ክፍለከተማ ፖሊስ መምሪያ አስታውቋል።
ኅዳር 04 ቀን 2017(መናኸሪያ ሬዲዮ) የጉለሌ ፖሊስ መምሪያና የጉለሌ ክፍለ ከተማ አስተዳደር ከህዝብ የመጣላቸውን ጥቆማ መሰረት በማድረግ ባደረጉት ክትትል የጉለሌ ወረዳ 5 ቤቶች አስተዳደር ፅ/ቤት ሃላፊ አቶ ሳምሶን ይልማ የተባለው አመራር ከግል ተበዳይ የቀበሌ ቤት ከእጅ መንሻ ነፃ በሆነ መንገድና በቤቶች መመሪያ መሰረት ማስተናገድ እየተገባው መንግስት የጣለበትና ሃላፊነትና የሰጠውን አደራ ወደ ጎን በመተው 50,000 ብር ጉቦ ጠይቋል ነው የተባለው።
ሃላፊው ከግል ተበዳዮች ቤት ድርስ ሄዶ ግቢ በማንኳኳት በማስጨነቅና የጠየቀው ገንዘብ ካልተሰጠው ውል እንደሚሰርዝ በማስፈራራት ትላንት ኅዳር 03 ቀን 2017 ዓ.ም ከምሽቱ 1: ስዓት አካባቢ 50,000ሺ ብር በጥሬው ሲቀበል መረጃው ቀድሞ የደረሰው ፖሊስና የአስተዳደሩ አካላት እጅ ከፈንጅ በመያዝ ወደ ጉለሌ ፖሊስ መምሪያ በመውሰድ ጉዳዮን እያጣሩ እንደሚገኝ ገልጿል።
የጉለሌ ክፍለ ከተማ አስተዳደር በበኩሉ ማንኛውም አገልግሎት ፈላጊ ህብረተሰብ ያለምንም የእጅ መንሻ እና ጉቦ በተቀመጠው ህጋዊ አሰራር መሰረት መስተናገድ ህገ መንግስታዊ መብቱ ስለሆነ እንደዚህ ያለ አስነዋሪ ድርጊት ሲገጥመው ለሚመለከተው የፀጥታ አካልና ለአስተዳደሩ በመጠቆም ህዝብና መንግስትን የሚነጣጥሉ ሌቦችን፤ደላሎችን በማጋለጥ ሃላፊነቱን እንዲወጣ ሲል አሳስቧል።
ምንጭ፦ መናኸሪያ ሬዲዮ


















