ላለፉት ሦስት ወራት እግድ ተጥሎበት የነበረው የመሬት አገልግሎት ካለፈው ሰኞ መጋቢት 23 ቀን 2016 ዓ.ም ጀምሮ መነሳቱ ተገለጸ።
በአዲስ አበባ ከተማ አስተዳደር መሬት ልማትና አስተዳደር ቢሮ በተጠናው የመዋቅር ጥናት መሠረት የሰራተኞች ድልድል ተካሂዶ ምደባ እስከሚካሄድ ድረስ ከጥር 21 ቀን 2016 ዓ.ም ጀምሮ ላለፉት ሦስት ወራት ታግዶ የቆየው የመሬት አገልግሎት፣ የዜጎችን መብት የጣሰ እንደነበር በመናገር ተገልጋዮች ሲያማርሩ ቆይተዋል።
አስተዳደሩ እንደገለጸው አጠቃላይ የሰራተኛ ድልድሉ በመጠናቀቁ ከቀን ከመጋቢት 23 ቀን2016 ዓ.ም ጀምሮ የመሬት አገልግሎት የተጀመረ መሆኑን አስታውቋል።

አገልግሎት ለማግኘት የሚያስፈልጉ ቅድመ ሁኔታዎች፦
- ዲጂታል የነዋሪነት መታወቂያ/Tin Number
- የይዞታ ማረጋገጫ ካርታ
- ተወካይ ከሆኑ በሰነዶች ማረጋገጫ የጸደቀ ውክልና
- ጉርድ ፎቶ ግራፍ
- ስም ዝውውር ከሆነ፦ የሽያጭ ውል/የወራሽነት ማስረጃ/፣ የስጦታ ውል፣ የአክሲዮን ማህበር የተመሰረተበት ማስረጃ(በአይነት መዋጮ የተላለፈበት ማስረጃ)
ማሳሰቢያ፡-
ሁሉም መረጃዎች በሶፍት ኮፒ ተዘጋጅተው አገልግሎት በሚያመለክቱበት ወቅት መረጃዎችን ዌብሳይት ላይ መጫን ወይም Upload ማድረግ ይጠበቅቦታል።
ድህረ ገጽ፡ www.addisland.gov.et

ከስም አገልግሎት ውጭ ያሉ አገልግሎቶችን ለማግኘት ኢ-ሰርትፊኬት ስለሚያስፈልግ በቅድሚያ “የይዞታ ማረጋገጫ ካርታን በአዲስ መልክ አሻሻሎ መስጠት አገልግሎት” የሚለውን አገልግሎት መምረጥ ይኖርባቸዋል።


















