ሕንፃ ግንባታ ደህንነትን ሳያሟሉ ለአደጋ አጋላጭ በሆነ መልኩ እየሠሩ በተገኙ አልሚዎች ላይ እስከ 2 ሚሊዮን ብር የሚደርስ የገንዘብ ቅጣትና የእርምት እርምጃ መውሰዱን በአዲስ አበባ ከተማ አስተዳደር የግንባታ ፈቃድና ቁጥጥር ባለሥልጣን አስታውቋል፡፡
በባለሥልጣን መሥሪያ ቤቱ የክትትልና ቁጥጥር ዘርፍ ምክትል ዋና ዳይሬክተር ኢንጂነር አመለወርቅ አሰፋ እንዳስታወቁት በከተማዋ ውስጥ በተካሔደ የቁጥጥርና ክትትል ሥራ የሕንፃ ደህንነት መስፈርቶችን ሳያሟሉ ለአደጋ አጋላጭ በሆነ መልኩ ግንባታ ሲያካሒዱ የተገኙ አልሚዎች ላይ በገንዘብ እንዲቀጡና አስተዳደራዊ እርምጃ እንዲወሰድባቸው ተደርጓል።
በዚህም መሠረት የሕንፃ ደህንነት መስፈርቶችን ባላሟሉ አልሚዎች ላይ በሕጉ መሠረት እስከ 2 ሚሊዮን ብር የሚደርስ የገንዘብ ቅጣት ሲጣል በኮንትራክተርና አማካሪዎች ላይ ደግሞ አስተዳደራዊ የእርምት እርምጃ ተወስዷል ብለዋል።


እንደ ኢንጂነር አመለወርቅ ማብራሪያ የሕንፃ ደህንነት መስፈርቶችን በመጣስ የሚፈጸሙ ግንባታዎች ሁሉ በሥራው ላይ በተሠማሩ ሠራተኞችና በአካባቢ ነዋሪዎች ላይ ሕይወት የመጥፋትና የአካል መጉደል እንዲሁም በንብረት ላይ ከፍተኛ ጉዳት ሊያስከትሉ ይችላሉ።
በመሆኑም የሕንፃ ግንባታ ደህንነትን ማስጠበቅ የሁሉም ሓላፊነት እንደሆነና ሕግን ማክበር ሕይወትን እንደሚጠብቅ በመግለጽ ይህ ዓይነቱ የቁጥጥር ሥራ በቀጣይም ተጠናክሮ እንደሚቀጥል በማወቅ ሁሉም አልሚ፣ ኮንትራክተርና አማካሪዎች የሕንፃ ግንባታ ደህንነትን አሟልተው እንዲሠሩ አሳስበዋል።
ምንጭ፦ የአዲስ አበባ ግንባታ ፈቃድና ቁጥጥር ባለስልጣን


















