ቤት ፈላጊዎች በግል የባንክ አካውንታቸው ገንዘባቸውን ቆጥበው የሚፈልጉት አይነት ቤት ተሰርቶላቸው የሚወስዱበት አዲስ ፕሮጀክት ይፋ ሆነ
ቤት ፈላጊው ቤቱ ተጠናቆለት ካርታ ሲረከብ ብቻ ገንዘቡን ለቤት ገንቢው ያስተላልፋል።
በሪል እስቴት እና የተለያዩ ትላልቅ የህንፃ ግንባታ ፕሮጀክቶች የረጅም ጊዜ ልምድ እና ታማኝነት ያለው ኮምፓስ ፕሮፐርቲስ ከጎህ ቤቶች ባንክ ጋር በጋራ ተግባራዊ የሚያደርጉትን በአይነቱ አዲስ የሆነ የቤት ግንባታ ፕሮጀክት ዛሬ ይፋ አድርገዋል።
በሌላው አለም የሪል እስቴት ዘርፍ በስፋት ስራ ላይ የዋለ በሃገራችን ግን እስካሁን ያልተተገበረ አሰራር መሆኑን የኮምፓስ ፕሮፐርቲስ የስራ ሃላፊዎች ገልፀዋል።
ይህ አዲስ ፕሮጀክት፤ ቤት መግዛት የሚፈልግ ግለሰብ በቅድሚያ 500 ሺ ብር ተቀማጭ በማስገባትና በሚፈልገው የቤት ካሬ መሰረት በየወሩ በራሱ ስም በጎህ ቤቶች ባንክ ደብተር ከፍቶ መቆጠብ የሚጠበቅበት ሲሆን ለቁጠባው 15% ወለድ ይታሰብለታል።

በዚህ ሂደት ውስጥ ግን ገንዘቡ በራሱ በግለሰቡ አካውንት የሚቀመጥ እንጂ ወደ ኮምፓስም ሆነ ወደ ጎህ አካውንት የሚገባ ምንም አይነት ገንዘብ አይኖርም ብለዋል።
በተጨማሪም ቤት ፈላጊው በሚፈልገው የጊዜ ገደብ ቤቱ ተጠናቆ መረከብ የሚችል ሲሆን ካርታ ሲረከብ ብቻ ገንዘቡን ከራሱ የቁጠባ ሂሳብ ወደ ቤት ገንቢው ያስተላልፋል። ግለሰቡ የቆጠበውን ገንዘብ ማውጣት ከፈለገም ገንዘቡን ማዉጣት ከፈለገ ለባንኩ ቀድሞ በማሳወቅ ማዉጣት እንዲችል አሠራር ተቀምጧል።
በተጨማሪም ለዚህ አገልግሎት ምንም አይነት የአገልግሎት ክፍያ አይጠየቅበትም ተብሏል።
የባንክ እገዛ የሚፈልግ ደንበኛም ቀሪ ክፍያውን ከባንክ ጋር በማያያዝ ቤቱን መረከብ እንደሚችልና የቤቱን ካርታ እስኪረከብ ድረስ ያስቀመጠው ገንዘብ ከፍተኛ ወለድ እንደሚኖረውም ገልፀዋል።
ከተማው ላይ ከሪል እስቴት ጋር ተያይዞ በተደጋጋሚ የሚሰማውን ቅሬታ እና ችግር በእጅጉ ይቀርፈዋል የሚል እምነት እንዳላቸውም ኮምፓስ ፕሮፐርቲስ እና ጎህ ቤቶች ባንክ ጠቁመዋል።
ምንጭ፡ Ethiopian News Agency















